Akademia e Shkencave ka mbajtur sot forumin e tretë shkencor "Pandemia e shkaktuar nga Covid-19 dhe përballimi i saj në Shqipëri”

Details

Hits: 13182

Hapja e forumit u bë nga akad. Genc Sulçebe, Kryetar i komisionit të mjekësisë pranë Akademisë së Shkencave. 

“Akademia e Shkencave ka ndjekur që nga fillimi në mënyrë proaktive pandemimë, nuk është kufizuar vetëm nga informacionet e marra nga bota, por ka bërë studime direkte në fushë duke monitoruar ecurinë e pandemisë. Disa nga këto rezultate ne i paraqitëm në forumin e parë online të cilin Akademia e organizoi në fund të tetorit të 2020-s, por ishte kur ende duhej të formalizoheshin ato masa që duheshin marrë për të penguar përhapjen e pandemisë, pra si të thuash masat pasive, pasi masa aktive nuk kemi, ndërsa tani për fat në këtë forum të dytë mund të flasim edhe për masat aktive, pra për vaksinimin që është me të vërtetë arma finale për virusin dhe shpresojmë që sigurisht rezultatet e tij do të jenë me sukses.”, tha akad. Sulçebe dhe ftoi kyetarin e ASH-së akad. Skënder Gjinushin për të hapur forumin, duke theksuar se akad. Gjinushi ka luajtur një rol shumë të rëndësishëm në studimet që ka ndërmarrë Akademia për të monitoruar me sukses kushtet e ecurisë së pandemisë në vendin tonë.

Akad. Skënder Gjinushi në fjalën përshëndetëse përgëzoi komisionin e mjekësisë që është krijuar pranë ASH dhe ka treguar rezultate me punën aktive në këtë pëvojë të parë që u krijua nga ligji i ri. Falënderoi të gjithë anëtarët e komisionit dhe grupin e pandemisë të krijuar së bashku me specialistët e tjerë të fushave të tjera që ka mundësuar për të rritur edhe bashkëpunimin e strukurave të Akademisë me strukturat e tjera shëndetësore dhe me Ministrinë e Shëndetësë. Falënderoi zëvëndësministren për praninë dhe bashkëpunimin e krijuar gjatë betejës me Covid-19 dhe theksoi më tej se: “gjithë qëllimi ynë ka qenë që gjithë strukturat e Akademisë të luajnë një rol të caktuar komplementar, plotësues, mbështetës, oponence konstruktive në këtë betejë të përbashkët dhe sigurisht anëtarë të komisionit apo të njësisë që është krijuar gjithashtu të biogjenetikës janë edhe anëtarë të strukturave të caktuara shtetërore që janë në krye të betejës. Në këto komisione kemi edhe mjekët e linjës së parë, të cilët i provuan edhe mbi vete pasojat apo rrezikun e kësaj sëmundjeje , që u vetësakrifikuan dhe rrezikuan dhe jetën e tyre në këtë betejë.”

E pranishme ishte edhe zonja Mira Rakacolli, zv.ministre e shëndetësisë dhe Kryetare e komisionit të ekspertëve pranë komisionit të shëndetësisë, e cila foli për situatën e pandemisë dhe vaksinimin e popullsisë, duke falënderuar punën e palodhur të mjekëve dhe përmendi kontributin e kryeministrit Rama që janë siguruar një numër i konsiderueshëm vaksinash dhe dhe u arrit të jemi sot në numrin më të lartë të ritmit të vaksinimit në rajon.

Forumi i dytë për pandeminë lidhet me fazën e tretë të luftës ndaj Covid-19, që Shqipëria e kaloi nga fundi i shkurtit dhe faktin që jemi ne fazën e vaksinimeve.

Prof. Arjan Harxhi i fakultetit të Mjekësisë, UMT, QSUT “Nënë Tereza” foli për evolucionin e skemave mjekuese të COVID-19 gjatë pandemisë në Shqipëri. Pas një analize të detajuar sesi ka qenë menaxhimi i Covid në Shqipëri, prof. Harxhi tha se parimet e mjekësisë së mbështetur në evidenca janë më të rëndësishme tani në këtë kohë të pandemise sesa në çdo periudhë tjetër të karrierës sonë.

Nuk duhet të përdoren ndërhyrje të patestuara nga mjekët.

Të gjithë ne bashkë duhet të bëjmë ç’është e mundur për të mundësuar që përgjigjja jonë ndaj pandemisë të bazohet në shkencë dhe jo në aspektet emocionale, politike apo ekonomike që e sfidojnë atë.

Për vaksinimin ndaj COVID-19 në Shqipëri - ecuria, perspektiva dhe vlerësimi i efektivitetit ka folur prof. asoc. Silva Bino, Instituti i Shëndetit Publik, Fakulteti i Mjekësisë, UMT, e cila me grupin e punës ka analizuar shkencërisht të dhënat deri më 12 prill 2021.

Znj. Bino tha se në vendin tonë kemi pëdorur katër lloje të ndryshme vaksinash BioNTech & Pfizer, COVAX, CORONAVAX , AstraZeneca dhe dha një pasqyrë të ngjarjeve pas vaksinimit.

Për infeksionin COVID-19 në moshat pediatrike në vendin tonë” foli Gjeorgjina Lito-Kuli, fakulteti i mjekësisë, UMT, QSUT “Nënë Tereza”, e cila theksoi se Covid-19 është një sëmundje infektive pandemike me forma klinike me gravitet të ndryshëm në të gjitha grupmoshat.

Fëmijët infektohen në ritme më të pakta se adultët dhe me gravitet më të lehtë. Rastet pediatrike përbëjnë 3% të rasteve pozitive, prej të cilëve 4.6% janë hospitalizuar.

Grupmosha më e prekur është 1- 4 vjeç, ndërsa komplikacionet e rënda shfaqen në moshën mbi 5 vjeç, si ARDS, sepsis, S. Kaëasaki, MIS-C ( 12%) të cilat mund të shfaqen dhe në fëmijë pa pathologji shoqëruese dhe disa javë pas kalimit të infeksionit.

Prof. Asoc. Alban Ylli, Instituti i Shëndetit Publik, Fakulteti i Mjekësisë, UMT- 11.15 foli për veçoritë e dinamikës së prevalencës dhe incidencës së infeksionit COVID-19 në Shqipëri. Ai bëri një analzië të nivelit të trasmetimit komunitar deri më 15 Prill, 2021, dhe tha se në javët në vijim do të ketë një mumër të ulët të riskut, si pasojë e efektit të vaksinës në parandalimin e infektimit. Por edhe duhet të jeni të përgatitur për një valë risku potencial të infektimit nga virusi, tha prof. Ylli.

Për treguesit e hospitalizimit dhe mortalitetit nga Covid-19 në vendin tonë krahasuar me vendet e tjera dha një raport të hollësishëm dr. Ilir Alimehmeti, fakulteti i mjekësisë, UMT dhe QSUT “Nënë Tereza”. Prof. asoc. Helidon Nini, QSUT “Nënë Tereza” mbylli forumin me një analizë për infeksionin COVID-19 dhe sëmundjet onkologjike.