REAGIMI SHKENCOR KUNDER COVID19

Seksioni i Shkencave Natyrore dhe Teknike miraton kandidaturat për titujt “akademik” dhe “akademik i asociuar” të ASH-së

Akademik Fejzi HOXHA

Fejzi HOXHA
Fusha: Mjekësi


Akademik Fejzi HOXHA

Fejzi HOXHA (1909–1992). Mjek internist dhe endokrinolog, profesor, akademik, Hero i Punës Socialiste. Lindi në Gjirokastër. Shkollën e mesme e filloi në qytetin e lindjes dhe e mbaroi në Liceun Kombëtar (francez) në Korçë. Ndoqi studimet e larta për mjekësi e u diplomua në Universitetin e Bolonjës (1930–1936). Punoi si mjek patolog në Spitalin e Përgjithshëm Civil (1936–1943). Më 1944 u bashkua me forcat partizane si mjek i Shtabit të Divizionit II S të UNÇSH. Pas çlirimit mori pjesë në riorganizimin e Spitalit të Shkodrës. Në vitin 1946–1952 qe drejtor i Spitalit Civil të Tiranës; pedagog në katedrën e terapisë së Fakultetit të Mjekësisë të Institutit të Lartë Mjekësor (1955–1956); përgjegjës i katedrës së Terapisë spitalore në FM (1956–1958). Qe anëtar i Institutit të Shkencave nga viti 1955 dhe anëtar i ASHSH që me themelimin e saj. F.H. është themeluesi i endokrinologjisë, nefrologjisë dhe dietologjisë në vendin tonë. Monografia “Gusha endemike në Shqipëri” (1976) qe rezultat i një pune shumëvjeçare të mbështetur në depistimin e rreth 200 mijë vetave në mbarë vendin. Botoi librat “Njoftime historike mbi zhvillimin e mjekësisë në Shqipëri” (1962) dhe “Ushqimi i shëndetshëm dhe dieta në sëmundjet” (1986). Ka qenë deputet i Kuvendit Popullor në 8 legjislatura (1958–1990).